చేసిన పనినే పదే పదే చేస్తున్నారా? ఒకే ఆలోచన మనసుని వేధిస్తోందా ?

తాళం వేసి అది సరిగ్గా పడిందో లేదో ఒకటికి రెండు సార్లు చెక్ చేసే వాళ్ళని చూసారా? లేదంటే తాళం వేసి సగం దూరం వెళ్ళి మళ్ళీ వెనక్కి వచ్చి తాళం లాగి చూసే వాళ్ళని? రోజుకు పదులు ఇరవైల సార్లు చేతులు కాళ్ళు కడుక్కోనే వాళ్లని? ఆఫీస్లో లేదా ఇంట్లో టేబిల్ మీద లేదంటే షో కేస్ లో వస్తువులను యధా స్థానం లో, అంటే ఒక్క ఇంచ్ తేడా లేకుండా, సర్దే వాళ్ళని చూసారా? చెడు శకునం కనిపిస్తే పది సార్లు నోట్లో దేవుడు పేరు చెప్పుకొంటూ ముందుకు వెళ్ళే వాళ్ళని చూసారా? వస్తువులను పది సార్లు లెక్కపెట్టడం... మళ్ళీ మళ్ళీ చెప్పిన మాటనే అనుకోవడం.... ఇవన్నీ రిపిటిటివ్ బిహేవియర్స్. ఇక్కడే నేను ఒక కన్ఫెషన్ చేయాలి. చేతులకి మన కళ్ళకి కనబడని మట్టి బ్యాక్టీరియా ఉంటుందని భయం, అనుమానం తో నేను ఒకటికి రెండు కాదు అంత కంటే ఎక్కువ సార్లు చేతులు శుభ్రంగా కడుక్కొనేదాన్ని. అంతే కాదు పిల్లలకి కూడ అలాగే చెప్పేదాన్ని, ఎపుడైతే అదో డిసార్డర్ అని తెలుసుకొన్నానో అపుడు తగ్గించాననుకోండి.ఇంతకీ చేసినదే పదే పదే చేసే డిసార్డర్ నే OCD అంటారు. ఇలాంటి థీమ్ మీద సినిమాలు కూడా చూసే ఉంటారు.  నేను చెప్పిన ఈ రిపిటిటివ్ బెహేవియర్స్ కొన్ని మాత్రమే. ఇంకా విచిత్రమైనవి చాలానే ఉన్నాయి. నాకు బాగా గుర్తు మా తాతమ్మ ఎప్పుడో పోయిన వాళ్ళని గుర్తు చేసుకొని, వాళ్ళు పోయినపుడు తాను స్నానం చేసిందా లేదా అని బోలెడు సార్లు మమ్మల్ని అడుగుతూ ఉండేది. మా అంకుల్ అమెరికా లో ఉంటారు. ఆయన బాత్రూమ్ కి వెళ్ళేటపుడు డోర్ నాబ్ చేత్తో కాకుండా టిష్యూ పేపర్ తో పట్టుకొని తీస్తారు. దాని మీద ఉంటే జెర్మ్శ్ ఆయనకి అంటకుండా. ఇంకో పెద్దమనిషి ఇంట్లో నుంచి ఎవరైనా బయటకు వెళ్తే వాళ్ళకి ఏదో ఘోర ప్రమాదం జరిగినట్టు ఊహించుకొని , వాళ్ళకి ఫోన్ చేసి పలు సార్లు వారు బాగోగులు కనుక్కుంటూ ఉంటారు. ఇవన్నీ కూడా ఆబ్సెసివ్ థాట్స్, బిహేవియర్స్ కలబోస్తే ఓ సి డి. ఇది కొద్ది మందిలో నలుగురు గమనించే బిహేవియర్ గా ఉంటే మరికొందరిలో వ్యాధి గా ముదిరి వైద్యం అవసరం పడుతుంది. ఎపుడైతే ఈ తరహా బిహేవియర్ లేదా ఆలోచనల వల్ల లైఫ్ క్వాలిటీ తగ్గిపోతోందో అపుడు దానికి ట్రీట్మెంట్ తప్పనిసరి. కొందరిలో కొంత కౌన్సెల్లింగ్ తో సమస్య పరిష్కారం అయితే మరికొందరికి మందులు బెహేవియర్ థెరపీ అవసరం కావచ్చు. అందుకే మీకు కానీ మీ కుటుంబంలో ఎవరికైనా ఓ సి డి ఉంటే తప్పనిసరిగా కండిషన్ తీవ్రత మేరకు సహాయం తీసుకోవాలి.