గర్భసంచి తొలగింపు ఆపరేషన్ హిస్టరెక్టమీ ఎపుడు అవసరం?

ఈ పోస్ట్ స్త్రీల ఆరోగ్య సంబంధ ముఖ్యమైన సమస్య గురించి.. అదే  హిస్టరెక్టమీ లేదా గర్భాశయన్ని తొలగించే శస్త్ర చికిత్స. ఈ మధ్య ఎంతో మంది చెప్తుంటే విన్నాను. గర్బ సంచి తీయించేశానండి అంటూ. మనకి మనం తీయించుకోవాలనుకోవడం కంటే కూడా ఒక వైద్య కారణంగా గర్భ సంచి తొలగించుకోమని వైద్య సలహా మేరకు తీయించుకోవడం  ఈ రెండు వేర్వేరు. ఏది ఏమైనా హిస్టరెక్టమీ కేసులు నేడు ఎక్కువగా చూస్తున్నాం. గర్భధారణలో ముఖ్య పాత్ర పోషిస్తుంది గర్భసంచి. బిడ్డను తొమ్మిది నెలలు భద్రంగా పొదవి పట్టుకొని ఆ తరువాత బిడ్డ జన్మనిచ్చేదాకా - గర్భ సంచి అనే కండరం అనేక  విధులను పోషిస్తుంది.  వయసు పెరిగే కొద్ది, స్త్రీల శరీరాల్లో వచ్చే మార్పుల కారణంగా గర్భ సంచి ఆరోగ్యం కూడా కుంటు పడుతుంది. గర్భ సంచిలో ఏర్పడే కణితులు లేదా గడ్డలు, గర్భ సంచి ఉండవల్సిన స్థానం నుంచి జారి మూత్ర మార్గం వద్దకు వచ్చేయడం, గర్భసంచి లో లేదా ముఖ ద్వారం అంటే సర్విక్స్ , ఓవరీలు  అంటే అండాశయాల్లో క్యాన్సర్ వంటి వ్యాధులు, ఎండోమెట్రియాసిస్ - అంటే గర్భాశయ పొర, వెలుపల భాగాల మీదకు పెరగడం ఫలితంగా కలిగే ఇబ్బందులు, మోతాదు మించిన వజైనల్ బ్లీడింగ్ సమస్యలు, క్రానిక్ పెల్విక్ పెయిన్ అంటే దీర్ఘ కాలంగా ఉన్న పొత్తి కడుపునొప్పి - ఇలా పలు సమస్యలు గర్భ సంచి తొలగింపు వెనుక కారణాలు కావచ్చు. క్యాన్సర్ మినహా మిగతా అంటే నాన్ క్యాన్సర్ సమస్యలన్నిటిని పరిగణించి ముందుగా వాటికి చికిత్స చేయడం, అలా కూడా ఫలితం లేకుంటే హిస్టరెక్టమీ కి అవకాశం ఎక్కువగా ఉండొచ్చు. మొన్నీమధ్య మా కుటుంబంలో ఒకరు హిస్టరెక్టమీ చేయించుకొన్నారు, ఆవిడ వయసు దగ్గర దగ్గర ఏభై ఉండొచ్చు. గర్భసంచి లో గడ్డలు పెరిగాయని వాటి సైజ్ ఇంతకు ముందు యేడాది తో పోలిస్తే ఇపుడు మరింత పెరిగాయని ఆ తరువాత  బ్లీడింగ్ కూడా ఎక్కువే ఉంటోందని ఆవిడ వైద్య సలహా తీసుకోగా హిస్టరెక్టమీ చేసి గర్భసంచి ఓవరీలు కూడా తీసేశారని అది ల్యాప్రోస్కొపీక్ ప్రొసీజర్ ద్వారా చేయించుకొన్నానని అవిడ చెప్పింది. ఆయా స్త్రీలలో సమస్య తీవ్రత బట్టి గర్భాశయం పూర్తిగా లేదా పాక్షికంగా ఒక్కో సారి అండాశయాలు ( ఓవరీలు ) ఫెలోపియన్ ట్యూబులు కూడా తీయాల్సి రావచ్చు. అండాశయాలు హార్మోన్స్ ఉత్పత్తి చేస్తాయి. ఇక ఫెలోపియన్ ట్యూబులు ఓవరీల నుంచి అండాలను  గర్భాశయానికి చేరవేస్తాయి. స్త్రీలలో పునరుత్పత్తి గుణం అంతా ఈ అవయవాల మీదనే ఆధార పడి ఉంటుంది. ఎపుడైతే ఈ అవయవాలను గర్భాశయన్ని తొలగిస్తారో ఇక వారిలో నెలసరి ఆగిపోతుంది. అందుకే పిల్లలు కలిగే వయసులో ఉన్న స్త్రీలలో గర్భాశయ తొలగింపు ఒక బెస్ట్ ఆప్షన్ కాకపోవచ్చు.